Kristi forklarelsesdag
GT
En profet som deg
5Mos 18,15-18
18:15Ein profet som meg skal Herren din Gud reisa opp for deg, frå din eigen midte, frå brørne dine. Han skal de lytta til. 16Dette er det du bad om frå Herren din Gud ved Horeb på forsamlingsdagen, då du sa: «Lat meg ikkje lenger høyra røysta til Herren min Gud, og lat meg ikkje sjå denne store elden meir, så eg ikkje døyr.» 17Då sa Herren til meg: «Det dei har sagt, er godt. 18Eg vil reisa opp ein profet for dei mellom brørne deira, ein som deg. Eg vil leggja orda mine i munnen hans, og han skal tala til dei alt det eg byd han.
Åp
Menneskesønnen åpenbarer seg
Op 1,9-18
1:9Eg, Johannes, bror dykkar og medbrør i trengsla og riket og uthaldinga i Jesus, eg var på øya som heiter Patmos, for Guds ord og vitnemålet om Jesus skuld. 10Eg vart gripen av Anden på Herrens dag, og eg høyrde ei veldig røyst bak meg, som lyden av ein basun. 11Ho sa: «Det du ser, skriv det i ei bok og send det til dei sju forsamlingane: til Efesos, Smyrna, Pergamon, Tyatira, Sardes, Filadelfia og Laodikea.» 12Eg snudde meg for å sjå røysta som tala til meg. Og då eg snudde meg, såg eg sju lysestakar av gull. 13Midt mellom lysestakane var det ein som likna ein menneskeson, kledd i ein fotsid kjortel og med eit gullbelte om brystet. 14Hovudet og håret hans var kvitt som kvit ull, som snø, og auga hans var som eldsloge. 15Føtene hans var som bronse glødande i ein omn, og røysta hans var som lyden av veldige vassmengder. 16I høgre handa si heldt han sju stjerner, og ut frå munnen hans gjekk det eit skarpt, tviegga sverd. Andletet hans var som sola når ho skin i full kraft. 17Då eg såg han, fall eg ned for føtene hans som ein død. Men han la høgre handa si på meg og sa: «Ver ikkje redd! Eg er den første og den siste, 18og den levande. Eg var død, men sjå, eg lever i all æve, og eg har nyklane til døden og dødsriket.
Evangelium
Disiplene får se Jesu herlighet
Matt 17,1-9
17:1Seks dagar seinare tok Jesus med seg Peter, Jakob og Johannes, bror hans, og førte dei opp på eit høgt fjell der dei var åleine. 2Der vart han forvandla framfor dei. Andletet hans lyste som sola, og kleda hans vart kvite som lyset. 3Og sjå, Moses og Elia synte seg for dei og samtala med han. 4Då tok Peter til orde og sa til Jesus: «Herre, det er godt for oss å vera her. Om du vil, skal eg setja opp tre hytter, ei til deg, ei til Moses og ei til Elia.» 5Medan han enno tala, sjå, då overskygga ei lysande sky dei. Og sjå, ei røyst frå skya sa: «Dette er Son min, han som eg elskar, i han har eg mi glede. Høyr han!» 6Då læresveinane høyrde dette, kasta dei seg ned med andletet mot jorda og vart fylte av stor redsle. 7Men Jesus gjekk bort til dei, rørte ved dei og sa: «Reis dykk opp og ver ikkje redde!» 8Og då dei løfta blikket, såg dei ingen andre enn Jesus åleine. 9Medan dei gjekk ned frå fjellet, baud Jesus dei og sa: «Fortel ikkje nokon om dette synet før Menneskesonen har stått opp frå dei døde.»