3. søndag i påsketiden
GT
Den gode gjeteren
Esek 34,11-16
34:11For så seier Herren Gud: Sjå, eg vil sjølv leita etter sauene mine og sjå til dei. 12Liksom ein gjetar ser til flokken sin den dagen han er midt blant dei spreidde sauene sine, slik vil eg sjå til sauene mine. Eg vil berga dei frå alle stadene dei vart spreidde til på ein dag med skyer og skodde. 13Eg vil føra dei ut frå folka, samla dei frå landa og føra dei til deira eige land. Eg vil gjeta dei på fjella i Israel, i dalane og på alle bustadene i landet. 14På gode beite vil eg gjeta dei, og på dei høge fjella i Israel skal dei ha hamna si. Der skal dei liggja i god hamn, og på feitt beite skal dei beita på fjella i Israel. 15Eg vil sjølv gjeta sauene mine og la dei kvila, seier Herren Gud. 16Dei bortkomne vil eg leita etter, dei fordrivne vil eg føra tilbake, dei skadde vil eg forbinda, og dei sjuke vil eg styrka. Men dei feite og sterke vil eg øydeleggja. Eg vil gjeta dei med rettferd.
eller
Apostlane
Vend om og la dere døpe
Apg 2,36-41
2:36Så skal heile Israels hus vita for visst at Gud har gjort han til både Herre og Kristus, denne Jesus som de krossfesta.» 37Då dei høyrde dette, stakk det dei i hjarta, og dei sa til Peter og dei andre apostlane: «Brør, kva skal vi gjera?» 38Peter svara dei: «Vend om og lat dykk døypa, kvar ein av dykk, i Jesu Kristi namn til forlating for syndene, og de skal få Den Heilage Ande som gåve. 39For lovnaden gjeld dykk og borna dykkar og alle dei som er langt borte, så mange som Herren vår Gud kallar.» 40Med mange andre ord vitna han og formana dei og sa: «Lat dykk frelsa frå denne vrange slekta!» 41Dei som tok imot ordet hans, vart døypte, og den dagen vart det lagt til omkring tre tusen sjeler.
Brev
Hyrde og tilsynsmann
1Pet 2,20-25
2:20Kva ros er det om de held ut når de syndar og blir slått for det? Men om de held ut når de lid for det gode de gjer, då er det nåde hos Gud. 21Til dette vart de kalla, for òg Kristus leid for dykk og etterlet dykk eit førebilete, så de skal følgja i fotspora hans. 22Han gjorde inga synd, og det fanst ikkje svik i munnen hans. 23Når han vart spotta, svara han ikkje med spott. Når han leid, truga han ikkje, men overlét si sak til han som dømmer rettferdig. 24Han bar syndene våre på sin eigen kropp opp på treet, så vi skulle døy bort frå syndene og leva for rettferda. Ved hans sår har de fått lækjedom. 25For de var som sauer som hadde gått seg vill, men no har de vendt om til hyrdingen og tilsynsmannen for sjelene dykkar.
Evangelium
Den gode gjeteren
Joh 10,11-18
10:11Eg er den gode gjetaren. Den gode gjetaren gjev livet sitt for sauene. 12Men leigekaren, som ikkje er gjetaren og ikkje eig sauene, ser ulven koma og forlet sauene og rømmer — og ulven riv dei og spreier dei — 13for han er berre ein leigekar og bryr seg ikkje om sauene. 14Eg er den gode gjetaren, og eg kjenner mine, og mine kjenner meg, 15slik som Far kjenner meg og eg kjenner Far. Og eg legg livet mitt ned for sauene. 16Eg har òg andre sauer som ikkje høyrer til denne kvea. Dei må eg òg leia, og dei skal høyra røysta mi. Og det skal bli éi flokk og éin gjetar. 17Difor elskar Far meg, fordi eg gjev livet mitt for å ta det att. 18Ingen tek det frå meg, men eg gjev det av meg sjølv. Eg har makt til å gje det, og eg har makt til å ta det att. Dette bodet har eg fått frå Far min.