Kristi åpenbaringsdag
GT
Et lys for folkeslag
Jes 49,1-7
49:1Høyr på meg, de øyar, og gjev akt, de folk langt borte! Herren kalla meg frå mors liv, frå mora mitt skjøte nemnde han namnet mitt. 2Han gjorde munnen min lik eit skarpt sverd, i skuggen av si hand gøymde han meg. Han gjorde meg til ei blank pil, i pilkoggeret sitt løynde han meg. 3Han sa til meg: «Du er tenaren min, Israel, gjennom deg vil eg visa mi herlegdom.» 4Men eg sa: «Til fånyttes har eg slite, til inkjes og tomleik har eg brukt krafta mi.» Likevel er retten min hos Herren, og løna mi er hos min Gud. 5Og no seier Herren, han som forma meg frå mors liv til å vera tenaren hans, for å føra Jakob tilbake til seg og samla Israel hos seg – eg er æra i Herrens auge, og min Gud har vorte mi kraft – 6Han seier: «Det er for lite at du er tenaren min til å reisa opp att Jakob sine stammar og føra dei bevarte av Israel tilbake. Eg gjer deg til eit lys for folkeslaga, så frelsa mi kan nå til enden av jorda.» 7Så seier Herren, Israels utløysar, hans Heilage, til han som er forakta og avskydd av folket, til han som er tenar for herskarar: Kongar skal sjå det og reisa seg, fyrstar skal bøya seg ned, for Herrens skuld, som er trufast, for Israels Heilage, som har valt deg ut.
Brev
Håp som skriftene gir
Rom 15,4-6
15:4For alt det som er skrive tidlegare, er skrive til lærdom for oss, så vi ved tolmod og trøyst frå Skriftene skal ha von. 5Måtte Gud, som gjev tolmod og trøyst, gje dykk å vera samstemde med kvarandre etter Kristus Jesus, 6så de samstemt, med éin munn, kan prisa Gud og Far til vår Herre Jesus Kristus.
Evangelium
Jesus som tolvåring i tempelet
Luk 2,40-52
2:40Barnet voks og vart sterkt og var fylt av visdom, og Guds nåde var over han. 41Kvart år fór foreldra hans til Jerusalem til påskehøgtida. 42Då han var tolv år gammal, drog dei dit opp som vanleg til høgtida. 43Då høgtidsdagane var til ende og dei skulle fara heim, vart guten Jesus verande att i Jerusalem utan at foreldra visste om det. 44Dei trudde han var med i reisefølgjet, og fór ei dagsreise fram før dei tok til å leita etter han blant slektningar og kjenningar. 45Då dei ikkje fann han, vende dei attende til Jerusalem og leita etter han. 46Etter tre dagar fann dei han i tempelet. Der sat han midt blant lærarane, lydde på dei og stilte spørsmål. 47Og alle som høyrde på han, var fulle av undring over kor klok han var, og over svara han gav. 48Då foreldra fekk sjå han, vart dei slegne av undring, og mor hans sa til han: «Barnet mitt, kvifor har du gjort dette mot oss? Far din og eg har leita etter deg med stor uro.» 49Han svara dei: «Kvifor leita de etter meg? Visste de ikkje at eg må vera i det som høyrer Far min til?» 50Men dei skjøna ikkje kva han meinte med det han sa til dei. 51Så vart han med dei heim til Nasaret og var lydig mot dei. Men mor hans gøymde alt dette i hjarta sitt. 52Og Jesus gjekk fram i visdom og alder og i nåde hos Gud og menneske.