3. søndag i åpenbaringstiden
GT
Alle som tørster, kom hit
Jes 55,1-3
55:1Å, alle de som tørstar, kom til vatnet! Og de som ikkje har pengar, kom, kjøp og et! Ja, kom og kjøp utan pengar, utan betaling, både vin og mjølk! 2Kvifor brukar de pengar på det som ikkje er brød, og strevet dykkar på det som ikkje mettar? Høyr på meg, så skal de få eta det som godt er, og fryda dykk over feite retter. 3Bøy øyra dykkar hit og kom til meg! Høyr, så skal sjela dykkar leva! Eg vil gjera ei evig pakt med dykk, den trufaste nåden eg lova David.
Åp
Livets vann
Op 22,16-17
22:16«Eg, Jesus, har sendt engelen min for å vitna om dette for dykk i forsamlingane. Eg er Davids rot og ætt, den skinande morgonstjerna.» 17Og Anden og brura seier: «Kom!» Og den som høyrer, skal seia: «Kom!» Og den som tørstar, skal koma. Den som vil, skal få ta livsens vatn for inkje.
Evangelium
Kvinnen ved brønnen
Joh 4,4-26
4:4Han laut fara gjennom Samaria. 5Så kom han til ein by i Samaria som heitte Sykar, nær det jordstykket som Jakob gav til Josef, son sin. 6Der var Jakobskjelda. Jesus var trøytt etter ferda og sette seg ned ved kjelda. Det var omkring den sjette timen. 7Då kom ei samaritansk kvinne for å henta vatn. Jesus sa til henne: «Gjev meg noko å drikka!» 8For læresveinane hans hadde gått inn i byen for å kjøpa mat. 9Den samaritanske kvinna sa til han: «Korleis kan du som er jøde, be meg, ei samaritansk kvinne, om drikke?» For jødar har ikkje omgang med samaritanar. 10Jesus svara henne: «Om du visste kva Guds gåve er, og kven det er som seier til deg: Gjev meg drikke, så hadde du bede han, og han hadde gjeve deg levande vatn.» 11Kvinna sa til han: «Herre, du har ikkje noko å ausa med, og brunnen er djup. Kvar får du så det levande vatnet frå?» 12Du er vel ikkje større enn far vår Jakob, som gav oss brunnen? Han drakk sjølv av han, og sønene hans og buskapen hans òg.» 13Jesus svara henne: «Kvar den som drikk av dette vatnet, vil tørsta att. 14Men den som drikk av det vatnet eg vil gje han, skal aldri meir tørsta. Det vatnet eg gjev han, skal bli ei kjelde i han med vatn som veller fram til evig liv.» 15Kvinna sa til han: «Herre, gjev meg dette vatnet, så eg ikkje tørstar og ikkje treng koma hit for å henta vatn.» 16Han sa til henne: «Gå og hent mannen din og kom hit att.» 17Kvinna svara: «Eg har ikkje mann.» Jesus sa til henne: «Du har rett når du seier at du ikkje har mann. 18For du har hatt fem menn, og han du no har, er ikkje mannen din. Det du sa, var sant.» 19Kvinna sa til han: «Herre, eg ser at du er ein profet. 20Fedrane våre tilbad på dette fjellet, men de seier at Jerusalem er staden der ein skal tilbe.» 21Jesus sa til henne: «Tru meg, kvinne, den timen kjem då de korkje skal tilbe Far på dette fjellet eller i Jerusalem. 22De tilbed det de ikkje kjenner. Vi tilbed det vi kjenner, for frelsa kjem frå jødane. 23Men den timen kjem, ja, han er alt komen, då dei sanne tilbedarane skal tilbe Far i ånd og sanning. For slike tilbedarar vil Far ha. 24Gud er ånd, og dei som tilbed han, må tilbe i ånd og sanning.» 25Kvinna sa til han: «Eg veit at Messias kjem – han som blir kalla Kristus. Når han kjem, skal han fortelja oss alt.» 26Jesus sa til henne: «Det er eg, eg som talar med deg.»