5. søndag i åpenbaringstiden
Salme
Han tilgir og leger
Sal 103,1-6
103:1Av David. Lovsyng HERREN, mi sjel, og alt som i meg er, lovsyng hans heilage namn! 2Lovsyng HERREN, mi sjel, og gløym ikkje alt det gode han har gjort! 3Han tilgjev all di skuld og lækjer alle dine sjukdomar. 4Han friar livet ditt frå grava og kronar deg med nåde og miskunn. 5Han mettar deg med gode gåver, så ungdomen din vert fornya som ørna. 6HERREN gjer rettferd og skaffar rett for alle som vert undertrykte.
Brev
Forbønn, salving og omsorg
Jak 5,13-16
5:13Lid nokon blant dykk vondt? Han skal be. Er nokon glad til sinns? Han skal synga lovsongar. 14Er nokon blant dykk sjuk? Lat han kalla til seg dei eldste i kyrkjelyden, og lat dei be over han og salva han med olje i Herrens namn. 15Og bøna i tru skal frelsa den sjuke, og Herren skal reisa han opp. Og om han har gjort synder, skal dei bli tilgjevne han. 16Vedkjenn difor syndene for kvarandre og be for kvarandre, så de kan bli lækte. Bøna frå ein rettferdig verkar med stor kraft.
Evangelium
Den syke ved Betesda
Joh 5,1-15
5:1Etter dette var det ei høgtid for jødane, og Jesus drog opp til Jerusalem. 2I Jerusalem, ved Saueporten, er det ein dam som på hebraisk heiter Betesda. Han har fem søylegangar. 3I desse låg det ei mengd sjuke: blinde, halte og folk med visna lemmer. 4For ein engel steig ned i dammen frå tid til anna og rørte opp vatnet. Den første som steig ned etter at vatnet var rørt opp, vart frisk, same kva sjukdom han hadde. [Dette verset manglar i dei eldste handskriftene.] 5Der var det ein mann som hadde vore sjuk i trettiåtte år. 6Då Jesus såg han liggje der og visste at han hadde vore sjuk i lang tid, sa han til han: «Vil du bli frisk?» 7Den sjuke svara han: «Herre, eg har ingen til å hjelpe meg ned i dammen når vatnet blir rørt opp. Og medan eg er på veg, stig ein annan ned før meg.» 8Jesus sa til han: «Stå opp, ta båra di og gå!» 9Straks vart mannen frisk, og han tok båra si og gjekk. Men det var sabbat den dagen. 10Difor sa jødane til han som hadde vorte lækt: «Det er sabbat, og du har ikkje lov til å bere båra.» 11Men han svara dei: «Han som gjorde meg frisk, sa til meg: Ta båra di og gå!» 12Dei spurde han: «Kven er den mannen som sa til deg: Ta henne opp og gå?» 13Men han som var lækt, visste ikkje kven det var, for Jesus hadde trekt seg unna sidan det var mykje folk på staden. 14Seinare fann Jesus han i tempelet og sa til han: «Sjå, du har vorte frisk. Synd ikkje meir, så det ikkje skal hende deg noko verre.» 15Mannen gjekk bort og fortalde jødane at det var Jesus som hadde gjort han frisk.