Samefolkets dag
GT
Moses og tornebusken
2Mos 3,1-6
3:1Moses gjette småfeet til Jetro, svigerfaren sin, som var prest i Midjan. Ein gong førte han flokken ut over øydemarka og kom til Guds fjell, Horeb. 2Der synte Herrens engel seg for han i ein eldsloge som slo opp frå ein tornebusk. Han såg at busken stod i lys loge, men busken brann ikkje opp. 3Moses sa: «Eg vil gå bort og sjå dette underfulle synet – kvifor busken ikkje brenn opp.» 4Då Herren såg at han gjekk bort for å sjå, ropa Gud til han frå tornebusken: «Moses, Moses!» Han svara: «Her er eg.» 5Gud sa: «Kom ikkje nærare! Ta skorne av føtene dine, for staden du står på, er heilag grunn.» 6Han sa: «Eg er Gud til far din, Abrahams Gud, Isaks Gud og Jakobs Gud.» Då gøymde Moses andletet sitt, for han var redd for å sjå på Gud.
Apostlane
Pinsedagen
Apg 2,1-12
2:1Då pinsedagen kom, var dei alle samla på same stad. 2Brått kom det ein lyd frå himmelen, som av ein kraftig stormvind, og han fylte heile huset der dei sat. 3Og det synte seg for dei tunger som av eld, som delte seg og sette seg på kvar einskild av dei. 4Då vart dei alle fylte med Den Heilage Ande og tok til å tala på andre tungemål, alt etter som Anden gav dei ord å tala. 5I Jerusalem budde det gudfryktige jødiske menn frå alle folkeslag under himmelen. 6Då denne lyden kom, samla folkemengda seg og vart forvirra, for kvar einskild høyrde dei tala på sitt eige språk. 7Dei var heilt frå seg av undring og sa: «Er ikkje alle desse som talar, galilearar? 8Korleis kan då kvar av oss høyra dei tala på vårt eige morsmål? 9Partarar og medarar og elamittar, dei som bur i Mesopotamia, Judea og Kappadokia, Pontos og Asia, 10Frygia og Pamfylia, Egypt og områda i Libya ved Kyréne, og tilreisande frå Roma, 11både jødar og proselyttar, kretarar og arabarar – vi høyrer dei tala om Guds storverk på våre eigne språk.» 12Alle var frå seg av undring og visste ikkje kva dei skulle tru. Dei sa til kvarandre: «Kva kan dette vera?»
Evangelium
Jesus møter disiplene
Joh 21,9-13
21:9Då dei kom i land, såg dei eit kolbål der, med fisk oppå og brød. 10Jesus sa til dei: «Kom hit med noko av fisken de nettopp fekk.» 11Simon Peter gjekk då om bord og drog garnet på land. Det var fullt av stor fisk, eitt hundre og femtitre i alt. Og endå det var så mange, rivna ikkje garnet. 12Jesus sa til dei: «Kom og få mat!» Ingen av læresveinane våga å spørja han: «Kven er du?» For dei visste at det var Herren. 13Jesus kom og tok brødet og gav dei, og like eins fisken.