13. søndag i treenighetstiden
GT
Jetro gir Moses råd
2Mos 18,13-24
18:13Dagen etter sette Moses seg for å døma folket. Folket stod framfor Moses frå morgon til kveld. 14Då svigerfaren til Moses såg alt det han gjorde for folket, sa han: «Kva er dette du gjer for folket? Kvifor sit du åleine medan heile folket står omkring deg frå morgon til kveld?» 15Moses svara svigerfaren sin: «Folket kjem til meg for å spørja Gud til råds. 16Når dei har ei sak, kjem dei til meg, og eg dømer mellom dei og kunngjer Guds forskrifter og lover.» 17Svigerfaren til Moses sa til han: «Det du gjer, er ikkje bra. 18Du vil slita deg heilt ut, både du og folket som er med deg. Oppgåva er for tung for deg; du kan ikkje gjera dette åleine. 19Høyr no på meg, eg vil gje deg eit råd, og Gud skal vera med deg. Du skal representera folket framfor Gud og leggja sakene deira fram for han. 20Du skal innprenta dei forskriftene og lovene, og visa dei vegen dei skal gå og gjerningane dei skal gjera. 21Men du skal velja ut dugande menn av heile folket, menn som fryktar Gud, pålitelege menn som hatar urett vinning. Set dei til leiarar over tusen, over hundre, over femti og over ti. 22Dei skal døma folket til kvar tid. Kvar stor sak skal dei føra fram for deg, men kvar lita sak skal dei døma sjølve. Slik vert det lettare for deg, og dei ber børa saman med deg. 23Om du gjer dette og Gud byd deg det, vil du kunna halda ut, og heile dette folket vil gå til sin stad i fred.» 24Moses lytta til svigerfaren sin og gjorde alt det han sa.
Apostlane
En ny tjeneste i menigheten
Apg 6,1-7
6:1I desse dagane, då talet på læresveinar auka, byrja dei gresktalande jødane å murra mot dei hebraisktalande, fordi enkjene deira vart oversedde i den daglege utdelinga. 2Då kalla dei tolv saman heile flokken av læresveinar og sa: «Det er ikkje rett at vi forsømer Guds ord for å stella med utdelinga.» 3Vel difor ut, brør, sju menn blant dykk som har godt ord på seg og er fylte av Ande og visdom. Dei skal vi setja til denne oppgåva. 4Men vi skal halda oss til bøna og tenesta med Ordet.» 5Forslaget fall i god jord hos heile forsamlinga, og dei valde Stefanus, ein mann full av tru og Den heilage ande, Filip, Prokorus, Nikanor, Timon, Parmenas og Nikolaus, ein proselytt frå Antiokia. 6Desse førte dei fram for apostlane, som bad og la hendene på dei. 7Guds ord hadde framgang, og talet på læresveinar i Jerusalem auka sterkt. Også ein stor flokk av prestane vart lydige mot trua.
Evangelium
Jeg har satt dere til å bære frukt
Joh 15,13-17
15:13Ingen har større kjærleik enn den som gjev livet sitt for venene sine. 14De er venene mine dersom de gjer det eg byd dykk. 15Eg kallar dykk ikkje lenger tenarar, for tenaren veit ikkje kva herren hans gjer. Eg har kalla dykk vener, for alt det eg har høyrt frå Far min, har eg gjort kjent for dykk. 16De har ikkje valt meg ut, men eg har valt dykk ut og sett dykk til å gå ut og bera frukt, ei frukt som varer, så Far skal gje dykk alt de bed om i mitt namn. 17Dette byd eg dykk: at de skal elska kvarandre.